Í samband við kjakið um fólkafráflyting og vantandi tilflyting skipaði Keypmannahavnarnevndin hjá MFS fyri kjaktiltaki saman við føroysku sendistovuni og ritstjórunum handan bókina, Exit Føroyar, á Norðurbryggju 16. novembur 2012.

Framløgufólkini vóru Erika Hayfield úr vinnumálaráðnum, ið er forkvinna fyri arbeiðsbólkin, ið landsstýrið hevur sett at arbeiða við avbjóðingin; Heri á Rógvi, búbúskaparfrøðingur og annar av ritstjórunum í bókini EXIT Føroyar; Heini í Skorini, stjórnmálafrøðingur og Ph.D. lesandi; Sigmundur Ísfeld, sendimaður Føroya í Keypmannahavn. Høgni Reistrup, ritstjóri, var orðstýrari til tiltakið.

Tíverri hava vit ikki tikið framløgurnar upp, men tú kanst síggja power point framløgurnar her:
Framløga hjá Sigmundur Ísfeld
Framløga hja Heina í Skorini
Framløga hjá Hera á Rógvi
Framløga hjá Eriku Hayfield

Og tú kanst eisini lurtað eftir samrøðuni, ið Kringvarpið gjørdi við forkvinnuna fyri MFS, Biritu í Dali.

Upp móti 200 føroysk lesandi høvdu leitað sær vegin fram til hetta MFS tiltakið, ið var tað seinasta í Keypmannhavn fyri í ár.

GFSL stuðulin hevur brúk fyri einum nýggjum navnið, og vit spyrja teg, hvat tað skal vera. Vit leita eftir er einum nýggjum, løttum navni, ið endurspeglar, hvat stuðulin virkar fyri.

Vinningurin er ein ferðaseðil, ið hevur gildi fram til 05.02.2014. Freistin at lata uppskot inn er 22. desember kl. 23.59 og vinnarin verður avdúkaður sjálvan jólaaftan 24. desember.

So um tú hevur eitt frískt, øðrvísi, kreativt, genialt ella okkurt heilt annað navnauppskot, so er hetta tín møguleiki at vinna tær sjálvum ein ferðaseðil í jólagávu.

Uppskot kunnu sendast til mfsmeylar@gmail.com (merkt "ferðaseðil") og við honum ein stutt frágreiðing um, hví tú heldur at uppskotið er gott, eins og tú skalt viðhefta upplýsingar um navn og lesna.

Treytin fyri luttøku er, at mann er lesandi og limur í MFS. Gerst limur her.

Grunnurin Fyri Styttri Lestrarferðir, GFSL, er ein ferðastuðul, ið verður latin lesandi, ið skriva um føroysk viðurskifti og í uppgávuhøpi hava tørv á at ferðast í egnum landi ella til eitt annað land.

Aftur í ár skipar MFS Keypmannahavn fyri vælumtóktu Ræstkjøtaveitsluni í Føroyahúsinum í Keypmannahavn.

Umframt ræst kjøt og súpan, verður sitrónskúm við hindberjum og kaffi at fáa omaná, øl frá Føroya Bjór og Lívsins vatn - tjóðarsnapsur føroyinga.

Undir borðhaldinum fer Mannbjørn Anthoniussen at spæla, og eftir hetta, verða borðini ruddað til síðis og Afrokid byrjar at diska. Dyrnar lata upp kl. 19.

Tað er avmarkað pláss, og í fjør var útselt! Les meira um tiltakið á Facebook síðuni.

Tey, sum vilja nýta sínar ástøðiligu førleikar í verki, fáa komandi hálva árið eitt frálíkt høvi til at royna seg. Landsverk fer at skipa fyri einari kapping, har lesandi, nýútbúgvin og onnur við góðum hugskotum til eitt ella fleiri av virkisøkjunum hjá stovninum, fáa møguleika fyri at koma við uppskotum til, hvussu ítøkiligar avbjóðingar kunnu loysast.

Málbólkur
Málbólkurin, sum kappingin vendir sær til, eru bæði nýggj lesandi og fólk við bachelor, kandidat ella phd-útbúgving. Nærliggjandi útbúgvingarøki eru innan verkfrøði, byggifrøði, arkitektur, búskaparfrøði, leiðslu, HR, samskifti ella kt. Ein slík kapping er uppløgd at taka støði í fyri tey, sum skulu í gongd við serritgerð ella onkra aðra verkætlan.

Kvota 2 er møguleikin hjá teimum, har miðaltalið í gymnasiala miðnámspróvnum ikki er nóg gott ella har umsøkjari hevur annað javngott prógv á sama stigi ella hægri. Tá verða eisini aðrir førleikar enn gymnasialt miðnámsskúlaprógv tiknir við í metingina.

Í hesum sambandi verður skipað fyri kunning um útbúgvingarnar. Byrjað verður í Suðri, har kunning verður komandi hósdag 21. februar á Miðnámsskúlanum í Hovi. Um dagin verður kunning fyri næmingum á Miðnámsskúlanum og um kvøldið kl 19 verður almenn kunning fyriskipað á sama staði kl 19. Her fáa fólk høvi at hoyra nærri um útbúgvingarmøguleikar á Setrinum til heystar.

Seinsta summar (2012) skipaði MFS fyri einum tiltaki um forritan av telduspølum. Í gjár hevði Dagur og Vika eitt brot um júst hettar. MFS frøðist um hettar átak og vit vilja fegin vísa á tær upptøkur vit hava av framløgunum frá tiltakinum "Telduspøl í Føroym?".

Partur 1. Mark Craig. Telduforritan í Bretlandi.
Partur 2. Julius Biskupstø. Telduforritan í Føroyum.
Partur 3. Rani Nolsøe. Íverksetan í Føroym.

Á Fróðskaparsetrinum verða nýggj lesandi tikin inn at lesa bachelorlestur á Námsvísindadeildini, Sjúkrarøktarfrøðideildini, Søgu- og Samfelagsdeildini og á Føroyamálsdeildini á hvørjum ári. Á Náttúruvísindadeildini verður arbeitt við at taka upp til nýggja útbúgving í ár kallað "Orku- og umhvørvisverkfrøði". Sostatt er í 2013 møguleiki at søkja inn á minst 7 ymiskar útbúgvingar á Setrinum.

Fyrilestrar, ið vóru á Østrøm týsdagin 26. februar um, hvønn leiklut og hvørja ávirkan universitet kunnu hava í smáum útjaðarasamfeløgum. Tveir serfrøðingar, Petur Arbo og Ingi Rúnar Eðvarðsson, greiða frá, hvussu universitet kunnu gerast eitt vakstraramboð í einum útjaðarasamfelagi.

Um Peter Arbo
Peter Arbo er lektari við fiskivinnuháskúlan á Tromsø Universitet. Peter Arbo hevur serliga granskað í økismenning, broytingum í vinnubygnaði og í, hvussu tað almenna kann ávirka samfelagsmenningina, millum annað við at styrkja gransking og hægri lestur. Peter Arbo var við til at gera OECD-verkætlanina “Supporting the regional role of higher education institutions”, ið snýr seg um, hvussu hægri lærustovnar kunnu ávirka útjaðaraøki.

Hann er eisini limur í stýrinum fyri universitetið í Tromsø, og hann var limur í nevndini, sum gjørdi norsku stjórnini álitið ”Sett under ett – ny struktur i høyere utdanning” , ið snýr seg um nýggjan bygnað í hægru útbúgvingunum í Noregi.

Um Inga Rúnar Eðvarðsson
Ingi Rúnar Eðvarðsson er professari í samfelagsvísindum á Háskóla Íslands. Hann gjørdist doktari í samfelagsfrøði við universitetið í Lund í Svøríki, og starvaðist við Universitetið í Akureyri frá 1987, tá tað varð stovnað, til hann í 2011 tók við professaraembætinum við Háskóla Íslands. Hann hevur sostatt hollar royndir í at fáa hægri útbúgvingar at virka í útjaðaraøkjum.

Hann hevur  almannakunngjørt vísindagreinir í, millum annað, vísindatíðarritum sum “Journal of Knowledge Management”, “Knowledge Management Research & Practice”, “International Journal of  Entrepreneurship and Small Business” og “Scandinavian Journal of Education Research”.

Sí annars:
http://www.vmr.fo/Default.aspx?ID=6855&Action=1&NewsId=5003&PID=25941

Aftur í ár skipaði MFS Keypmannahavn fyri vælumtóktu Ræstkjøtaveitsluni í Føroyahúsinum í Keypmannahavn.

MFS vil fegin takka fyri eitt sera hugnaligt kvøld, ið eins og seinasta ár var fullsett.

Umframt ræstkjøt og súpan, var sitrónskúm við hindberjum og kaffi at fáa omaná, øl frá Føroya Bjór og Lívsins vatn - tjóðarsnapsur føroyinga.

Undir borðhaldinum spældi Mannbjørn Anthoniussen, eftir hetta vóru borðini ruddað til síðis og Afrokid byrjaði at diska.

Sí myndir frá tilakinum her

MFS kann við gleði boða frá, at MFS aftur hevur fingið eina nevnd í Aarhus.

Við at seta eina lokala MFS nevnd á stovn í Aarhus fáa tey lesandi har eina sterkari rødd og ikki minst skipaði viðurskifti og samband heimaftur til Føroyar. Tað stóra netverkið, ið MFS gjøgnum nógv ár hevur bygt upp við føroyskar myndugleikar og føroyskt vinnulív, verður nú eisini lætt atkomiligt hjá lesandi í Aarhus.

MFS vónar, við hesari lokalu nevndini, at tiltøk felagsins koma at røkka enn longur tvørtur um Danmark, og vónandi enn fleiri føroyingar í Danmark koma at knýta bond til Føroyar og vónandi hava Føroyar í huga eftir loknan lesnað.

Við at víðka lokalu nevndirnar til eisini at umfata Aarhus, verður møguleiki at upplýsa føroyskar næmingar um møguleikar í Aarhus, so sum lestrar- og bústaðarviðurskifti.

Tey, ið manna Aarhus-nevndina eru:
Maria Ziskason, forkvinna
Elsa Maria Magnusardóttir Olsen
Marin Ennistein Heinesen
Arne Winthereig

MFS ynskir eins og politikkararnir, at útbúnu føroyingarnir flyta heim aftur til Føroya, men at taka pískin fram bøtir tó ikki um støðuna. Vit í MFS eru samd um, at tað er ikki rætta loysnin at broyta partin av ÚSUN, sum er settur av til skúlagjald, til lestrarlán.

ÚSUN stimbrar fjølbroytni

Áleið 225 føroyingar lesa í londum uttan fyri Norðurlond. Hesi fáa minni enn 12 milliónir krónur frá føroyska samfelagnum. Skilagóða íløgan, ið ÚSUN-skipanin er, stimbrar ungum at nema sær fjølbroyttar útbúgvingar. Verður ÚSUN lagt um til lán, fáa vit eina skipan, ið ger livikorini verri hjá teimum, ið leita sær uttanlands at lesa.

Á rættari kós? – Óætlaðar avleiðingar

Føroyar eru í harðari kapping við londini kring okkum um tað dýrasta tilfeingið, nevniliga menniskjuni. Uppskotið um at gera ÚSUN til lán ger als ikki kappingarførið betri. Endamálið við at broyta ÚSUN til lán er partvís fyri at fáa føroysk lesandi heim eftir loknan lestur. Men MFS loyvir sær at ivast í, um hetta málið verður rokkið við hesum amboðum.

Lesandi ynskja ikki at seta seg í skuld, og tað er sannlíkt, at nógv heldur fara at velja Danmark fram um onnur lond. Ein óætlað avleiðing er tí, at færri fara útum Norðurlond at ogna sær serkunnleika. Høvdu Føroyar umsitið lestrarstuðul til øll føroysk lesandi – eisini í Danmark –, so hevði støðan verið øðrvísi.

Ein onnur óætlað avleiðing er, at lesandi kring knøttin fata hesa lógina sum styggjandi og frástoytandi - og hetta er ikki ætlanin hjá politikkarunum. At seta ein lítlan part av teimum lesandi í skuld, um tey ikki koma heim, er beinleiðis skeivur boðskapur at senda! Meira sannlíkt verður, at lesandi tá fara til Danmarkar at lesa, so at lesandi sleppa frá at gjalda lánið aftur, um ein onkursvegna ikki kann flyta heim.

Føroyar skulu draga! - Ikki styggja!

Politikarar áttu heldur at roynt at bøtt um umstøðurnar hjá lesandi eftir loknan lestur við at givið teimum rættindi til m.a. eitt arbeiðsloysisgjald! - Tað hevði verið eitt dragandi átak!

At betra um tilboðini í Føroyum, menna umhvørvið og stimbra tilknýtið til Føroyar eru viðurskifti, ið kunnu birta undir, at lesandi venda aftur til teirra heim, Føroyar!

Við vón um eitt sakligt og fakligt kjak. - Við lestrarkvøðu

vegna MFS

Birita í Dali, forkvinna

Nýggja heitið

Flogvit er nýggja navni á stuðulinum, ið MFS veitir til lesandi!

Nýggja heitið, Flogvit, er sett saman av orðinum at flúgva og vitan. Hetta kundi ikki passa betur til stuðulin hjá MFS, ið verður latin til ferðing (oftast flúgving) í samband við at innsavna vitan.

Rólant Waag Dam, lesandi á RUC, eigur hugskotið.

Søk nú!

Stuðul frá Flogvit verður játtaður tvær ferðir um ári, á vári og á heysti. Freistir at søkja eru 1. apríl og 1. oktober á hvørjum ári.
Ferðing, sum stuðul verður søktur til, skal vera farin fram í tí tíðarskeiðinum, sum søkt verður til. Verður t.d. søkt 1. apríl skal ferðin vera farin fram í tíðarskeiðinum oktober-apríl sama ár. Les meira um Flogvit á www.mfs.fo/flogvit

MFS styrkir samstarvið vid grønlendsk lesandi Meginfelag Føroyskra Studenta og grønlendska lestrarfelagið, Avalak, hava nú birt undir samstarv millum feløgini.

Føroysk og grønlendsk lesandi standa mangan í somu støðu, millum annað, tá ið tey flyta til onnur lond at lesa. Lestrarlív í útlondum og politisk val í heimlandinum varð umrøtt á fyrsta fundinum millum lestrarfeløgini.

Forkvinnan fyri MFS, Birita í Dali, fundaðist við formannin fyri Avalak, Hans Peder Kirkegaard.

Á fundinum varð kjakast um felagsáhugamálini hjá føroyskum og grønlendskum lesandi, og feløgini samdist á fundinum um at arbeiða fram ímóti at skipa fyri kjaktiltaki, ið tekur evni upp, ið viðkoma bæði føroyingum og grønlendingum.

Feløgini kunnaðu um sínar royndir sínar innan lestrarøkið, og millum evnini var at fáa føroysk lesandi í Danmark at skráseta seg til veljaralistan til løgtingsvalið 2011, ið MFS hevði góðar royndir av. Grønlendska Avalak hevur just verið í gongd við at fáa lesandi til veljarastøðini í Danmark.

Danska SU skipanin var eisini á skránni á fundinum, nú grønlendska stjórnin hevur avgjørt, at grønlendsk lesandi ikki longur frá lestrarstuðul úr. Grønlandi, tey gerast tí partur av donsku SU skipanini, eins og føroysk lesandi í Danmark eru.

MFS fekk nógvan íblástur frá Avalak í samband við teirra mongu sosialu tiltøk, eins og teirra ágrytni at arbeiða fyri, at grønlendsk lesandi fáa starvsvenjingarpláss runt um í heiminum. Feløgini fegnast um nýggja samstarvið og síggja fram til felagsátøk innan
lestarøkið.

Við norðuratlantiskum lestrarkvøðum

MFS og AVALAK

Fríggjakvøldið 17. mai skipar Meginfelag Føroyskra Studenta fyri spennandi tiltaki á Norðurbryggju í Keypmannahavn.

Hesafer varpar MFS ljós á byrðardygd og varandi orkukeldur.

Føroyar vilja lækka CO² útlátið við 20% í 2020, og frá 2005 til 2012 er útlátið lækkað við 7%. Síðan 2009 hava Føroyar havt ein veðurlagspolitikk/vakstrarhúspolitikk, ið hevur til endamáls at lækka um vakstrarhúsgassini, men higartil hevur tað ikki havt úrslit við sær, tí útlátið var hægri í 2012 enn 2009. Ein atfinning er, at tað skulu størri og meira umfatandi politisk tiltøk til. T.d. var grøn menning ikki ein partur av dagsskránni til síðsta Løgtingsvalið í 2011.

Føroyar eru eitt lítið land, og útlátið er lutfalsliga til íbúgvatalið í hægra lagi. Hetta kemst millum annað av fiskiflotanum, ið letur út 40% av samlaða útlátinum av CO² í Føroyum, og fiskaídnaðinum, ið brúkar 40% av samlaðu lívrunnu nýtsluni í Føroyum.

Til tiltakið hava vit bjóða umboðum fyri framtaksfeløgini og Vinnumálaráðið, ið saman koma at geva okkum eina betri vitan um evnið og harvið vónandi eisini leggja upp til breitt kjak um menning av bæði grønari og bláari orku í Føroyum.

Umboðini eru:

Jóhan Dahl, landstýrismaður í vinnumálaráðum

Terji Nielsen, verkfrøðingur og verkætlanarleiðari, SEV

Suni Petersen fyri Umhvørvisstovuna

Meinhard Eliasen fyri Jarðfeingi

meira um tiltakið her: https://www.facebook.com/events/166076636892235/?fref=ts

Dyrnar lata upp kl. 19. Tiltakið byrjar kl. 19.30

Verður á Norðurbryggju fríggjakvøldið 17. mai

Strandgade 91, 1401 Keypmannahavn

Eftir at hava ligið stilt í áleið 10 ár, tók MFS Keypmannahavn upp aftur táttin at skipa fyri almennum flaggdagshaldi á studentagarðinum Regensen. Merkið var sjálvsagt heiðursgestur og vundið høgt á stong til skoða fyri øllum teimum, ið høvdu leitað sær inn á Regensen. Og vakurt blaktraði Merkið í lotinum hendan sólríka dagin.

Tiltakið byrjaði við rundferð á Regensen. Tað var Bartal Nolsøe Poulsen, ið býr á studentagarðinum, sum vísti fram og greiddi frá. Mannbjørn Jacobsen og Hans Mols Mortensen hildu hvør sína røðu við støði í søguliga staðnum, og eftir hetta bar Sissal Kampmann fram flaggdagsrøðuna. At enda vóru føroyskir sangir sungnir. Umframt talur og sang, bjóðaði MFS ókeypis kaffi, te og køku, og øl til keyps.

Umframt hugnaliga samveru, vil MFS eisini nýta høvið at takka fyri at fólk møttu so fjølment hendan góðveðurs dagin. Árliga flaggdagshaldið á Regensen skal avgjørt ikki detta niður fyri aftur.

MFS kannar lestrar- og starvslestrar møguleikar í USA

Fríggjadagin 17. mei hittust Birita í Dali, forkvinna í MFS, Marjun Lindarstein úr Keypmannahavnarnevnd MFS og tvey umboð fyri Sendistovu Ameriku í Danmark, Vibeke Musgrave og Travis Sevy.

Á myndini frá vinstru, Marjun Lindarstein, keypmannahavnarnevnd MFS, Birita í Dali, forkvinna í MFS, Vibeke Musgrave og Travis Sevy frá Sendistovu Ameriku í Keypmannahavn

MFS hevði tikið stig til fundin við tí fyri eygað at kanna møguleikar hjá føroyskum lesandi í USA.

Á fundinum greiddu MFS umboðini frá um felagið teirra lesandi, um støðuna í Føroyum sum heild í sambandi við útbúgvingar og lesandi.

Umboðini frá Amerikonsku Sendistovuni vístu á, at USA er áhugað í føroyskum lestrarviðurskiftum.

Fyrrverandi Amerikanska sendikvinnan í Danmark, Laurie S. Fulton var nevniliga eisini gestur á einum MFS tiltaki í fjør fyri at práta um lestrarmøguleikarnar hjá føroyingum í USA.

Umboðini frá Amerikonsku Sendistovuni høvdu serliga við mentan og útbúgving at gera, og vóru  tey eisini sinnað at styrkja sambandið við Føroyar og at luttaka á kjaktiltaki hjá MFS.

Á dagsskránni var starvslestrarmøguleikar, og Amerikanska Sendistovan søkir støðugt eftir lesandi, ið ikki eru amerikanskir borgarar, og her hava føroysk lesandi møguleika at søkja. Freistin er 31. mai. Sí hesa slóðina: http://denmark.usembassy.gov/about-us/jobs/internships.html

Hugsar tú sum føroyskur lesandi at kanna møguleikarnar at lesa í USA, kanst tú hyggja inn á heimasíðuna hjá Fullbright, ið hevur kontór í Keypmannahavn. Les meira her: http://www.wemakeithappen.dk/index.php/fulbright

Til tess at varpa ljós á og at kunna um viðurskiftini um grøna menning og útlát í Føroyum, skipaði MFS fyri tiltakinum “Orka úr ódn og brimi” tann 17. mai, á Norðurbryggju. Yvir 60 føroysk lesandi høvdu lagt leiðina framvið hetta kvøldið.

Dentur var lagdur á, hvussu Føroyar kunnu minka um CO2 útláti, og hvørjar møguleikar Føroyar hava fyri at menna um grøna og bláa orku og roynt var at seta hetta kjakið í eina hægri samfelagsliga raðfesting.

Samanumtikið var lýst, at Føroyar hava síðan 2005 lækkað útlátið við 7 &, tó málini, ið Føroyar hava sett sær eru at lækka útlátið við 20% í 2020. Umframt hesum, var sagt at síðan 2009 hava Føroyar havt ein veðurlagspolitikk/vakstrarhúspolitikk, ið hevur til endamáls at lækka um vakstrarhúsgassini, men higartil hevur tað ikki havt úrslit við sær, tí útlátið var hægri í 2012 enn 2009.

Føroyar eru eitt lítið land, og útlátið er í hægra lagi lutfalsliga til íbúgvatalið. Hetta kemst millum annað av fiskiflotanum, ið letur út 37% av samlaða útlátinum av CO² í Føroyum, og fiskaídnaðinum, ið brúkar 37% av samlaðu lívrunnu nýtsluni í Føroyum.

Eisini var nevnt, at stór frammgongd hevur verið á el-økinum, og at um fyritreytinar halda, so ber til at náa í 202einar Føroyar, har 70% av el-framleiðsluni stavar av varðandi .

Tiltakið var lagt til rættis soleiðis, at framløgur vóru at hoyra frá teimum ymsu umboðunum fyri framtaksfeløgini og Vinnumálaráðið, millum hesu umboð taldu;

Suni Petersen fyri Umhvørvisstovuna

Meinhard Eliasen fyri Jarðfeingi

Terji Nielsen, verkfrøðingur og verkætlanarleiðari hjá SEV

Johan Dahl, Landsstýriðsmaður í vinnumálum

Tá liðugt var at leggja fram hjá umboðunum, var skipað fyri einum pallborðs fundi, har áskoðarar settu áhugaverdar spurningar, umframt at umboðini sluppu at útdýpa seg eitt sindur meiri. Eirikur Sanderson og Marjun Lindarstein vóru orðstýrarar.

Framløgurnar vóru tiknar á band, og vit vóna, at tær vera klárar at leggja út her á heimasíðuna fyrsta dagin.